ESSE – Chjar’di Luna – Scola di Cantu dui Sorru – Cuncertu di carità à prò di a SCOLA CORSA – Samedi 31 Octobre 2026 à 20h00 – THEATRE EMPIRE AJACCIO

Esse, gruppu chì hà lasciatu a so stampa in u mondu musicale corsu di l’annate 90 incù un dischettu esciutu in u 1996, « Franchendu ssu passu ». U gruppu cumpostu di studienti esciuti di e scole di cantu di Natale Luciani in Aiacciu è di u liceu di u Fangu in Bastia si ferà un’affacata di purtellu à l’occasione di issu cuncertu sottu à u mottu di u cantu in lingua corsa è a so tramandera.

U gruppu Chjar’ di Luna hè natu da a brusta sempre calda d’Esse, dopu à parechji anni d’animazione. Hà cuminciatu anc’ellu à creà è dipoi una decina d’anni hà spalancatu e so porte à giovanni corsi primurosi d’impegnassi in a creazione. Dopu à un prima dischettu in u 2006, hè esciutu u secondu Album in u 2024, « Lettera di a Luna ». Serà l’occasione di prisentà lu à l’aiaccini senza scurdassi di qualchì canzona di u prima dischettu.

Ùn si pudia fà stu cuncertu senza mette in risaltu u travagliu maiò di e scole di cantu per a tramandera. Seranu i zitelli di a scola di cantu di i Dui Sorru chì ci feranu u piacè d’apre stu cuncertu in prima parte.
A nostra lingua hè in periculu è e scole immersive facenu parte di e soluzione per circà di salvà la, l’inseme di i benefizii di stu cuncertu anderanu à prò di Scola Corsa.

Infos & Billetterie Théâtre L’Empire.