DI STINTU È DI CORE in Bastia  – Mardi 29 Septembre à 20H00 – Centre culturel Alb’oru

Eiu, Ghjuvan Camelu PASQUALISò arradicatu à u mo paisolu d’Alzi di San-Damianu una cumuna d’Ampugnani cunfinandu cù l’Orezza è a Tavagna. Natu cù a passione di u cantu d’una famiglia di musicanti è cantadori, di a parte Zuaninca è Talloninca di a mo caccara, di San Damianu, u Ped’Orezza è Piedicroce pè a parte di caccaru.

Un’ochjata à u mo caru cumpare Alanu Nicoli cantadore di prima trinca partutu troppu prestu m’hà purtatu è datu sta forza musicale. À l’età di 6 anni facciu i mo primi passi è rivuccate cantu in paghjella cù u gruppu Madricale creatu da babbu in l’annata 86 chì ferma sempre u mo gruppu una famiglia in fratellanza.

L’aduliscenza mi porta ver di i Fulelli, cun amichi in caffè di Pierre Jé. Tandu a musica s’allarga : canti cun ghitarre, strumenti… è cresce torna a passione. Ci scopru i Chjami Aghjalesi, Petru Guelfucci, Esse, Felì, i Muvrini è tant’altri. Ampargu à sunà di ghitarra solu è cun amichi intimi ci ritruvemu à spessu per sunà tutti inseme. Ste stonde m’anu permessu d’alzà u mo nivellu musicale.

Eramu una piccula squadretta: Tristani, Bureau fratelli, Vincenti fratelli, Pieve, Albertini, Cayuela… Cun elli spuntanu i primi testi è creazione. Marcellu Tristani, pueta rinumatu di prima trinca, mi rigala un pugnu di scritti soi chì diventanu e mo prime cumpusizione. Cantemu è cantu per piacè senza pensà à altru restu.

U tempu passa è sò sulicitatu da parechje persone è amichi per fà qualcosa di persunale. Aghju unepoche di cumpusizione fatte, è dopu a riflessione è cun stu tempu chì passa sempre troppu in furia, mi dicu : « perchè nò »… Vò à circà amichi cari. Li dumandu u s’accunsentu per seguitammi nant’à stu chjassu di creazione d’un discu è mi rispondenu di si.

Squadra cumposta di Jean-Paul Pieve, Cédric Albertini, Paul Agostini, Louis Crispi, Pierre-François Ucciani è Nicolas Giovannetti chì venenu à dammi un colpu di manu per stu dischettu novu è ne sò felice. Aghju chjamatu à qualchì pueta per canzone nove : Ghjuvan’Federicu Terrazzoni amicu di sempre, Petru Santucci pueta Alisgianincu talentuosu, Letizia Cosimi tocca feminile, Josée Olivieri amica cara , Iviu Pasquali u mo babbu, u rigrettatu Marcellu Tristani u mo primu scrittore è Ghjuvanni Maestrali pastore Aschese.

Aghju chjamatu dinù à musicanti per intervene in studio : à u viulinu Elena Moncho-Danelian, à u viuluncellu Pascale Giraud, à e percuzione David Cruciani,à a ghitarra bassa Nicolas Zimako, ghitarra Nicolas Torracinta, à l’accunciamenti ghitarra è manduline Ghjaseppu Mambrini, à a mischjera Michel Tomei. Stu dischettu hè natu d’un impastu d’amore è di bona vuluntà mentre dui anni di travagliu.

Ghjè per quessa chì l’avemu chjamatu DI STINTU È DI CORE.

Billetterie sur CORSEBILLET.CO